На 22 април, во просториите на Македонско-бугарската стопанска комора, се одржа презентација посветена на современи решенија за електромобилност и инфраструктура за полнење на електрични возила.
Настанот беше реализиран во соработка со Czech Macedonian Association of Commerce (CMAC) – www.cmac.cz, при што на презентацијата присуствуваше и претставничката на асоцијацијата, г-ѓа Љиљана Јовановски Асенов.
Во фокусот на настанот беа:
- технолошки решенија за AC полначи за електрични возила (вклучително и 22 kW станици),
- можности за имплементација на полначка инфраструктура во деловни и јавни објекти,
- енергетска ефикасност и оптимизација на потрошувачката,
- европски трендови во е-мобилноста и регулаторна рамка,
- потенцијали за партнерства и деловна соработка на македонскиот пазар.
Присутните компании имаа можност да се запознаат со конкретни технички карактеристики на опремата, модели на поставување (корпоративни паркинзи, станбени комплекси, хотели, индустриски зони), како и со бизнис моделите за управување и монетизација на полначките станици.
Посебен акцент беше ставен на важноста од развој на одржлива инфраструктура како дел од зелената транзиција, намалувањето на јаглеродниот отпечаток и рационалното користење на електричната енергија. Е-мобилноста беше претставена не само како еколошка, туку и како стратешка економска можност за компаниите кои навремено ќе инвестираат во вакви системи.
Настанот потврди дека интересот за одржливи и енергетски ефикасни решенија во деловниот сектор е во пораст, а Комората ќе продолжи да поддржува иницијативи кои придонесуваат кон модернизација на инфраструктурата, зелена економија и регионална деловна соработка.
